“Келажакка қайтиб-2” фильмидаги (1989) боғичлари мустақил боғланадиган кроссовка реалликка айланди. Америкалик актёр, мазкур картинада бош рол – Марти Макфлайни ижро этган Майкл Жей Фокс унинг илк соҳибига айланди.

Бу ҳақда 22 октябрь куни спорт либослари, оёқ кийимлари ва инвентарлари ишлаб чиқариш соҳасида етакчи – Nike компанияси маълум қилди.
Фильмда айнан 2015 йилнинг 21 октябрь кунига келган қаҳрамон худди шундай хусусиятга эга келажакдаги спорт оёқ кийимида юргани тасвирланган эди.

“Бугун Nike мазкур кроссовкаларни илк бор намойиш этди ва уларни энг машҳур соҳиби бўлмиш Майкл Жей Фоксга совға қилди”, - дея хабар берди компания.
“Nike Mag кроссовкалари ўзида одатий боғичлар тизими ва такрорланмас дизайнни мужассам этиб, поп-маданиятнинг сўнмас маёғига айланади”, - дея қўшимча қилинган хабарда.

Маҳаллий компанияларнинг ёдга олишича, 2009 йилда Nike Automatic Lacing System ("Боғичларнинг автоматик тизими”) номи остида ўз маҳсулоти учун патент олган эди.