АҚШ Сурия президенти Башар Асад армияси мамлакатнинг иқтисодий пойтахти Ҳалабга қарши ҳужум амалга оширса уни маъқулламайди. Бу ҳақда Пентагонда йиғилган журналистлар билан Боғдоддан туриб видеоалоқа ёрдамида суҳбатлашган, Ироқ ва Суриядаги “Матонатли қатъият” операциясининг расмий вакили полковник Стив Уоррен маълум қилди.

“Биз бу ҳужумни икки сабабга кўра маъқулламаймиз. Биринчидан, уруш сиёсий жараён ёрдамида тугатилиши керак. Иккинчидан, Асаднинг кетиши бу сиёсий жараённинг бир қисми бўлиши керак”, деб айтди Уоррен.

Уорреннинг айтишича, агар шундай ҳужум амалга оширилса, унда бу “кескин жанг” бўлади. “Бироқ бу ҳақда ҳозир гапиришга эрта”, деб таъкидламоқда Уоррен.

Сурия қўшинлари Ҳалаб яқинида (Дамашқдан шимолга томон 355 км узоқликда жойлашган) қарши ҳужум операциясининг кўламини кенгайтирмоқдалар. Қўшинлар кучли арттайёргарликдан кейин Ҳалабдан жануби-ғарбий томонда жойлашган Сфайра аҳоли пункти устидан назоратни ўз қўлларига олди. 

Ҳукумат қўшинлари шаҳарнинг жанубий томонидан кираверишдаги Дамашқ-Ҳалаб автомобиль йўлининг бир қисми устидан назоратни қўлга олишни мақсад қилиб қўйганлар. Бу йўл орқали Сурия армияси назоратида бўлган Ҳалаб туманларига гуманитар юклар ва ўқ-дориларни етказиш йўли анча қисқаради.

Сурия армияси жангариларни кўнгилли тарзда қурол ташлашга чақирмоқда. Ҳалаб атрофида яшовчи аҳолига “жангарилар позицияларига яқинлашиш ва улар билан алоқага кирмаслик” тавсия қилинди.

Ҳалаб 2012 йил августдан бери икки қисмга бўлинган: унинг ғарбий кварталлари Сурия армияси назоратида, шарқий қисмлари эса 20 га яқин қуролланган гуруҳ назоратида қолмоқда. Жангарилар, шунингдек, Ҳалабдан шимол томондаги Туркия билан чегарадош ҳудудларни ҳам назорат қилмоқда.