Тошкент метрополитени бекатларидан бири «Пушкин» бекати номи ўзгартирилмайди.

«Тошкент метрополитени» ДУК бош муҳандиси Бахтиёр Ғуломовнинг Sputnik нашрига маълум қилишича, шаҳар ҳокимлиги ҳозирда бу масалани кўриб чиқмаяпти.

Мутахассиснинг сўзларига кўра, метро бекатлари номини ўзгартириш бўйича махсус комиссия иш олиб боради. Ҳозирда мазкур ишчи гуруҳдан иборат комиссия Пушкин номидаги бекатни ўзгартириш масаласини кўриб чиқаётгани йўқ. Ҳаттоки бу масала умуман кун тартибига ҳам киритилмаган.

Эслатиб ўтамиз, Пушкин ҳайкалининг жойи ўзгартирилиши муносабати билан август ойининг сўнггида метро бекатининг ўзгартирилиши мумкинлиги борасида хабарлар тарқатилганди.

Таъкидлаб ўтиш жоиз, охирги марта Тошкент метрополитенининг Ҳамза бекати Новза номига ўзгартирилганди.

Маълумот ўрнида қайд этиш лозим, Тошкент метроси 3та йўлдан иборат 29та бекатни ўз ичига олади. Метронинг умумий узунлиги 39 километрни ташкил қилади.