Исроилнинг Rafael Advanced Defense System компанияси Сеулдаги кўргазмада “Темир нур” деб номланган жанговор лазер тизимини намойиш қилди, деб хабар бермоқда Jane's 360 нашри.

Янги мажмуа ракета ҳужумига қарши мудофаа тизими ва учувчисиз парвоз қурилмаларига қарши курашга қаратилган вариантларда тақдим қилинди. Кўчма мажмуа таркибига радиолокацион қурилма, бошқарув пункти ва”бир неча ўн киловатт” қувватга эга иккита лазер қурилмаси киради. Компания хабарига кўра, уларнинг қувватини “бир неча юз киловаттга” ошириш режалаштирилмоқда.

Қурилма лазер нурларини “танга сиртига” тенг майдонга йўналтира олади. “Темир нур”нинг нишонга уриш узоқлиги 2 километрга яқинни ташкил қилади. Маълум қилинишича, қурилма муваффақиятли тарзда синовдан ўтказилган. Қурилма буюртмачининг эҳтиёжларига кўра исталган шассига ўрнатилиши мумкин.

Аввалроқ Британияда дронларга қарши “музлатувчи” нур яратилган эди.