Украиналик боксчи Владимир Кличко журналистларнинг саволларига жавоб бера туриб, ўз фаолиятини тугаллашни режалаштирмаётгани ҳақида маълум қилди.

39 ёшли бу спортчи ҳали спорт билан шуғулланишдан роҳат олишда давом этаётганини таъкидлаб ўтган.

"Кейинги 2-3 йилда мендан бир неча марта боксни қачон тарк этишим ҳақида сўрашди. Одамлар буни ўзаро муҳокама қилишаётганини ҳам эшитганман.

Биламан, боксчилик билан абадий шуғуллана олмайман. Лекин мен ҳозир боксни тарк этиш ҳақида ўйлаганим йўқ. Қачонки боксдан роҳат олмай қолсам, ўшанда кетишим мумкин", дейди Кличко Boxingnewsonline.net нашрига берган интервьюсида.

Эслатиб ўтамиз, бокс бўйича ўта оғир вазнда WBA/WBO/IBF талқинлари бўйича жаҳон чемпиони Владимир Кличко ва британиялик боксчи Тайсон Фьюри ўртасидаги жанг 24 октябрда бўлиб ўтиши керак эди. Бироқ Кличконинг жароҳат олгани сабабли жанг ўтказилиши санаси 28 ноябрга кўчирилган.