Сурия президенти Башар Асад Москвага уюштирган сўнгги сафари чоғида ўзини беш йил аввалгидек хотиржам тутди. Бу ҳақда Россия бош вазири Дмитрий Медведев ўз фейсбукида ёзди.

“Уни сўнгги бор 2010 йил май ойида Дамашққа бўлган сафаримда кўрган эдим. Ўшанда Сурия бутунлай бошқача мамлакат эди – сокин ва ривожланган. 2011 йилдан сурияликлар ҳаёти дахшатга айланди: уруш, террор, ўлим, диний қадамжолар ва дунё аҳамиятига молик ёдгорликларнинг вайрон этилиши.

Қайд этишни истардимки, йиллар ўтганига қарамасдан президент Асад Москвага уюштирган сўнгги сафари чоғида беш йил аввалгидек хотиржам ва вазмин эди”, - деди Медведов. Бош вазирининг қўшимча қилишича, Россия ҳеч қачон Сурия масаласидаги ўз позициясини ўзгартирмайди ва фақат қонуний ҳукуматни қўллаб-қувватлайди.

Эслатиб ўтамиз, Сурия президенти Башар Асад 2015 йил 20 октябрь куни Москвага ташриф буюриб, россиялик ҳамкасби Владимир Путин билан музокаралар ўтказди. Учрашувда Россия олий раҳбариятининг вакиллари кенгайтирилган таркибда музокараларда иштирок этган.