Ўзбекистонда кейинги 2 йил ичида биологик актив қўшимчалар (БАД) ишлаб чиқариш соҳасини янада ривожлантириш ҳамда маҳаллий хомашё асосида шундай маҳсулотлар ишлаб чиқарувчи корхоналар ташкил этиш режалаштирилди.

Бундай корхоналар ташкил этилиши билан "Узфармсаноат", "Дори-дармон" компанияси ва Соғлиқни сақлаш вазирлиги шуғулланади.

Sputnik нашри хабарига кўра, бугунги кунда Ўзбекистонда 70дан ортиқ хилдаги дори воситалари ва биологик актив қўшимчалар ишлаб чиқаришга ихтисослаштирилган 100га яқин корхона фаолият кўрсатмоқда. 20дан ортиқ фармацевтик компания дунёнинг 30дан ортиқ мамлакатига дори воситалари ва тиббий маҳсулотлар етказиб беради.

Тошкентдаги Биорганик кимё ва Кимё институтлари ходимлари Ўзбекистон фанлар академияси ҳамда Тошкент фармацевтика институти билан ҳамкорликда биологик актив қўшимчалар бўйича тадқиқотлар олиб боришмоқда.

Кейинги 20 йил ичида тадқиқотчилар 30га яқин дори воситалари ишлаб чиқишган. Уларнинг ишлари корхоналар томонидан ҳаётга татбиқ қилинган.