“Ўзбекистон темир йўллари” компанияси Тошкент механика заводи (собиқ В.Чкалов номидаги авиацион ишлаб чиқариш бирлашмаси) базасида ҳаракатдаги таркибларни ишлаб чиқаришга 202 миллион доллар сармоя киритади.

Ҳукумат томонидан тасдиқланган ишлаб чиқариш дастури 4 йўналишдаги 14 лойиҳани ўз ичига олади: янги юк вагонларини қуриш (йилига 650 дона), рефрижератор секция ва контейнерлар (300 дона), йўловчи вагонлари (50 дона), шунингдек, эҳтиёт ва бутловчи қисмлар ишлаб чиқариш. Лойиҳалар темир йўл компаниясининг шахсий маблағлари ҳисобига амалга оширилади.

Мазкур дастурни амалга ошириш учун Тошкент механика заводининг 81,52 фоиз ҳажмдаги давлат активлари “Ўзбекистон темир йўллари” устав фондига ўтказилди. 2015 йил сўнгига қадар муассаса имкониятларининг темир йўл компанияси ишлаб чиқариш тузилмаларига мослаштириш ишлари тугалланиши режалаштирилган. 2018 йилнинг 1 январига қадар ТМЗ янги ишлаб чиқаришни ташкил этиш фаолияти самарадорлиги учун бир қатор солиқ ва божхона имтиёзларига эга бўлади.