Мексика соҳилларига етиб келган “Патрисия” тўфони шамолининг максимал тезлиги турли маълумотларга кўра, 270-297 км/соатга етган.

АҚШ тўфонлар миллий маркази ўз сайтида шамол тезлиги 270 км/соатни ташкил қилаётганини, АҚШ об-ҳаво миллий хизмати эса ўлчаш натижаларига таяниб, шамол тезлиги 285 км/соатга етганини маълум қилмоқда.

Тўфоннинг коинотдан олинган суратларини ҳозирда Халқаро коинот станциясида фаолият юритаётган АҚШлик фазогир Скотт Келли ўзининг инстаграмида жойлаштирди.

Аввалроқ бир неча йиллардан бери биринчи марта кузатилаётган энг юқори хавфлик тоифасидаги “Патрисия” тўфони Мексика жануби-ғарбий соҳили яқинидаги Пуэрто-Вальярта курорт туманига эришгани маълум қилинганди.