Малайзия Олий суди ижтимоий тармоқдаги аккаунти орқали ИШИДни қўллаб-қувватлаган ва тарғиб қилган фуқарога нисбатан 2,5 йиллик қамоқ жазосини тайинлади. Бу ҳақда "Стар" нашри хабар берган.

Полиция шу йилнинг апрелида 55 ёшли Азиза Юсуфни ҳибсга олганди. Ундан компьютер ва мобил телефон мусодара қилинган.

Терговда аниқланишича, у Facebook ижтимоий тармоғида 2та саҳифа юритган: бири ўз номида, иккинчиси қизи номида.

У бу саҳифаларга ўзининг Суриядаги ИШИД сафига бориб қўшилган ўғли ҳақида маълумотлар ва суратлар жойлаштирган.

Бундан ташқари, унга ИШИДни тарғиб қилувчи маълумотларни тарқатганлик айби қўйилган.

Кейинроқ маълум бўлишича, унинг ўғли, Абу Убайдаҳ лақабли жангари Суриядаги жанглар вақтида ўлдирилган.

Малайзияда бироз олдинроқ, ўз телефонида ИШИД рамзи - қора байроқ тасвирини олиб юрган ҳарбий 7 ойга қамалганди.