23 октябрь куни 75 ёшини нишонлаган Пеледан испаниялик журналистлар интервью олишди.

У Marca мухбири саволларига жавоб берар экан, Бразилия футболининг ҳозирги ҳолати ва замонавий футбол юлдузлари ҳақидаги фикрларини баён этган.

Журналист ундан Бразилия терма жамоасининг ёмон натижаларига нима сабаб бўлаётгани ҳақида сўраган.

"Дунёнинг энг яхши футболчилари ҳозир ҳам Бразилияда туғилишади. Муаммо шундаки, улар пул топиш учун хорижга йўл олишади ва хориж футболига мослашишади", дейди "футбол қироли".

У Бразилия футболининг жозибаси йўқолмаганини таъкидлаб, терма жамоанинг ўйин услуби ҳам ўзгармаслигини айтиб ўтган.

Журналист Пеледан "Месси ва Роналду Пеле ва Марадона даражасига чиққани ҳақидаги гапларга муносабатини сўраган.

"Ўйлайманки, барча даврнинг ўз футболчилари бўлади. Бугун икки зўр футболчи бор - Месси ва Роналду. Месси қатъиятли футболчининг намунаси. Мен ҳам ўз вақтида ўзимни намоён этиш йўлида қийинчиликларни босиб ўтишимга тўғри келган. Роналду эса юқори тоифали тўпурар. Унинг ўйинидан роҳатланаман", дейди собиқ футболчи.

Журналист ундан 1970 йилги мундиалда Пеле кўрсатган ўйинни кейин кимдир такрорлай олгани ёки такрорлай олмагани бўйича саволга тутади.

"Бетакаллуфлик учун маъзур тутинг. Лекин Пеле каби футболчи кейин бўлмади", дейди Пеле.