Сурияда ИШИДга қарши ҳарбий ҳаракатларда иштирок этаётган Ислом инқилоби муҳофазаси Корпуси (ИИМК) генералларидан яна бири Ризо Ҳоварий жанг вақтида ҳалок бўлди. Бу ҳақда Фарс ахборот агентлиги хабар тарқатган.

"ИИМК генералларидан бири Суриядаги жанг вақтида ҳалок бўлди. Кейинги икки кун давомидаги жанглар вақтида жами 8 нафар эронлик ҳарбий ҳалок бўлди", дейилади хабарда.

"Ризо Ҳоварий ИИМКнинг "Фатемион" дивизияси генерали бўлиб, у Сурия армиясига ИШИД билан жангларда ҳарбий маслаҳатчилик қилиш вазифаси билан келганди. У Ҳама вилоятидаги жанг вақтида ҳалок бўлди", дейди агентликка маълумот берган ИИМКнинг расмий вакили Рамазон Шариф.

23 октябрь кунги жанглар вақтида Эроннинг собиқ президенти Маҳмуд Аҳмадинажотнинг (2005-2013) шахсий тансоқчиси сифатида ишлаган ҳарбий, ИИМК қўмондонларидан бири Бакири Нияраки ҳам ҳалок бўлди.

Эслатиб ўтамиз, 14 октябрь куни Эрондан 1000 кишилик ҳарбий контингент Сурия ҳукуматига ИШИД билан жанглар учун ёрдам бериш мақсадида етиб борган эди.

Биринчи кунги ҳарбий ҳаракатлардаёқ эронлик 3 нафар офицер ҳалок бўлганди. Булар полковник Фарҳод Ҳасунзода, бригада генерали Ҳожи Ҳамид Мухторбанд ва генерал Хосейн Хамдани эди. Уларнинг барчаси Ислом инқилоби муҳофазаси Корпуси аъзолари бўлишган.