Тожикистондаги хусусий авиакомпаниялардан бири "Сомон эйр" Тожикистон ва Қирғизистон пойтахтлари орасида авиарейсларни йўлга қўяди.

Авиакомпания матбуот хизматининг маълум қилишича, эндиликда компания самолётлари ҳафтада 2 марта, жума ва якшанба кунлари қатнай бошлайди.

Аниқлик киритилишича, самолётлар Душанбедан жума куни Бишкекка маҳаллий вақт билан соат 21:00да, якшанба куни эса соат 21:30да учади. Учиш давомийлиги 1 соату 20 минутни ташкил этади. Компания Бишкекка илк парвозни 30 октябрь куни амалга оширади.

Бишкеккача рейс чиптаси баҳоси 545 сомоний, учиш-қайтиш чиптаси баҳоси эса 760 сомоний этиб белгиланган. Барча парвозлар Боинг 737 саомолётлари орқали амалга оширилади.

Қайд этиш керакки, шу вақтгача Тожикистон ва Қирғизистон ўртасидаги авиаалоқалар Тожикистондаги "Таджик Эйр" ҳамда Қирғизистондаги «Авиа Траффик Компани» ва «Эйр Манас» миллий авиакомпаниялари орқали амалга ошириб келинади.

«Сомон Эйр» авиакомпанияси яқин вақт ичида ўзининг ҳаракатланиш кўламини янада кенгайтиришни, Душанбе-Дубай-Душанбе, Душанбе-Санкт-Петербург-Душанбе ва Душанбе-Алмати-Душанбе рейсларини ҳафтасига 3мартагча оширишни режалаштирган.
Шунингдек, Хўжанд-Санкт-Петербург-Хўжанд йўналишидаги парвозлар ҳафтасига 2 мартадан амалга оширилади.