4-6 ноябрь кунлари Буюк Британиянинг Уильям Шекспир номидаги "Глобус” театри жамоаси Ўзбекистонга ижодий ташриф уюштиради.

Мазкур ижодий сафар Ўзбекистон Республикаси Маданият ва спорт ишлари вазирлиги, Британия Кенгашининг Ўзбекистондаги ваколатхонаси ҳамда "Ўзбектеатр” ижодий-ишлаб чиқариш бирлашмаси томонидан ташкил этилмоқда.

"Глобус” театри жамоаси "Гамлет” спектаклини 4 ноябрь куни соат 14.00да ҳамда 19.00да намойиш этади (Ушбу спектакль бепул намойиш этилиб, театр ижодкорлари ва талабалар таклифнома орқали таклиф этилади. Спектаклда ўзбекистонлик ҳеч қайси актёрлар иштирок этмайди).

Мазкур лойиҳа давомида Ўзбек Миллий академик драма театри биносида "Шекспир асарлари Ўзбекистонда!” деб номланган кўргазма ташкил этилади.

5-6 ноябрь кунлари театр санъатида янги лойиҳалар халқаро форуми ўтказилади. Ушбу форумга барча театр мутахассислари ва ижодкорлари жалб этилган бўлиб, ундан кўзланган мақсад келажакда Британия ва Ўзбекистон маданий алоқаларини янги поғоналарга кўтариш ҳисобланади.

Маълумот учун, Британиянинг Уильям Шекспир номидаги "Глобус” театри тарихий маданий обидалар сирасига кирувчи бинога эга бўлиб, шу ном билан аталувчи Лондон шаҳридаги муҳташам театрдир. Илк бора "Глобус” театри 1599 йилда Темза дарёсининг жанубий қирғоғида Шекспир бошчилигидаги труппа маблағига қурилган бўлиб, ҳозирги кунга қадар уч маротаба қайта қурилиб, реконструкция қилинган.