Буюк Британия Ўрта Ер денгизига ноқонуний муҳожирларнинг Африка ва Яқин Шарқдан Европага ноқонуний йўл билан олиб ўтилиш ҳолатларига қарши кураш учун яна бир кема юборди. 

Sky News хабарига кўра, Буюк Британия Қуролли кучларига тегишли HMS Richmond фрегати Ливия қирғоқлари яқинидаги сувларни назорат қилаётган кемалар гуруҳига бориб қўшилган. Бу гуруҳ таркибидаги кемаларнинг мақсади контрабандачилар томонидан хавфли шароитларда одамларни денгиздан олиб ўтиш ҳаракатларига чек қўйиш ҳисобланади.
БМТ резолюциясига кўра, бу кемалар капитани шубҳали кемаларни тўхтатиш ва контрабанда ҳолатлари аниқланганда, кемаларни ўз назорати остига олиш ҳуқуқига эга бўлади.
Буюк Британия Мудофаа вазири Майкл Фэллон "контрабандачиларга қарши кураш чоралари кучайтирилиши"га ваъда берган.