Жаҳон банки 2020 йилгача Ўзбекистонга 2016-2020 йилга мўлжалланган ҳамкорликнинг янги стратегияси доирасида 4 млрд долларлик кредитлар тақдим қилиши мумкин. Бу ҳақда журналистларга Жаҳон банки лойиҳалари портфели бўйича етакчи координатор Динара Жўлдошева маълум қилди.  

Янги стратегия доирасида банк 25 та, яъни йилига 5 тадан лойиҳани амалга оширишни режалаштирмоқда. Янги стратегия ЖБ директорлар кенгаши томонидан 2016 йил январда кўриб чиқилади.

Маблағларнинг катта қисми инфратузилмани ривожлантириш, Ўзбекистон аҳолиси учун янги иш ўринларини яратиш ва аграр тармоғини қўллаб-қувватлаш учун йўналтирилади.  

Айни пайтда ЖБ ва Ўзбекистон 2012-2015 йилларга мўлжалланган ҳамкорлик дастури доирасида ҳамкорлик қилмоқда. ЖБ бу дастур учун 1,97 млрд доллар ажратган. Ҳамкорлик дастури доирасида кредитлаш Халқаро тараққиёт уюшмасининг (ЖБ гуруҳига киради) 40 йиллик муддатга (10 йиллик имтиёзли давр, йилига 0,75 фоиз ставкаси билан) мўлжалланган маблағлари ҳисобига амалга оширилади.   

Ўзбекистон 1992 йилдан бери ЖБ аъзоси ҳисобланади. Банк ҳаммаси бўлиб Ўзбекистонга хусусийлаштириш, молиявий тармоқ, қишлоқ хўжалигини модернизация қилиш, электр энергетика, ижтимоий инфратузилмани яхшилаш, соғлиқни сақлаш, таълим соҳаларига 1,8 млрд долларга яқин кредит берган.