АҚШ Давлат котиби Жон Керри Иордания ва Исроил Қуддусда Муқаддас тоғ ҳудудидаги кескинликни камайтириш чораларини кўриш ҳақида келишиб олдилар, деб хабар бермоқда Reuters ахборот агентлиги.

Керри Иордания пойтахти Уммонда Фаластин президенти Маҳмуд Аббос ва Иордания қироли Абдуллоҳ II билан учрашгандан кейин сўзлаган нутқида Исроил ва Иордания муқаддас жойда ихтилофни камайтиришга қаратилган қадамларни амалга оширишга келишиб олганини маълум қилди.

Керрининг айтишича, Исроил бош вазири Биньямин Нетаньяху Иордания томонининг хавфсизлик хизматлари 24 соатлик видеокузатув олиб бориши учун видеокамералар ўрнатиш таклифини юқори баҳолади.

Охирги бир неча кун давомида Иордан дарёсининг Ғарбий соҳили ва Ғазо секторидаги араб-исроил ихтилофи янги куч билан авж олиб кетди. Тўқнашувларнинг катта қисми Қуддуснинг қадимий кўчаларида юз бермоқда.

Тўқнашувлар оқибатида камида 52 нафар фаластинлик ва 9 нафар исроиллик ҳалок бўлгани маълум қилинмоқда.