“ВИА Гра” гуруҳининг собиқ аъзоси, ҳозирда ўзи мустақил ижод қилаётган, келиб чиқиши украиналик бўлган Вера Брежнева ва россиялик продюсер, бастакор Константин Меладзе (таниқли хонанда Валерий Меладзенинг акаси) Италияда яширинча турмуш қуришди. Италиянинг Il Tirreno нашрининг маълум қилишича, никоҳ маросими Италиянинг машҳур курортларидан ҳисобланган Форте-дей-Марми шаҳрида бўлиб ўтди.

Италия ОАВлари оқ гуллар гулдастаси билан юзини беркитаётган Брежневага ўхшаш қиз фотосуратини чоп этишган эди. Сўнгра эса тўй бўлиб ўтганини Брежневанинг матбуот-котиби Анастасия Драпенко ҳам тасдиқлади.

“Ҳа, бу ҳақиқат – Вера ва Константин Италияда расман турмуш қуришди. Улар жуда бахтли, бироқ ҳозирча бўлиб ўтган никоҳ тафсилотлари билан бўлишишга тайёр эмаслар. Бироз кутиш керак бўлади”, деб айтди Драпенко ОАВларга берган интервьюсида.

Маълум қилинишича, икки ошиқни Форте-дей-Марми мэри Умберто Буратти никоҳдан ўтказган. Мэр тўй 22 октябрда бўлиб ўтганини маълум қилди. “Тўйда кўп хорижий меҳмонлар бўлди, мен уларнинг кимлигини танимайман. Асосан русийзабонлар кўп бўлди. Мен бу ажойиб жуфтлик билан тўйдан бир кун аввалгина танишдим ва уларнинг
россиялик машҳур кишилар эканини билмасдим ҳам”, деб айтмоқда шаҳар мэри.

Хонанда ва продюсер ўртасида муҳаббат борлиги ҳақидаги гап-сўзлар бир неча йил аввал пайдо бўлган. Ўтган йили продюсер 19 йил бирга турмуш қурган рафиқаси Яна билан ажрашган эди, уларнинг уч нафар фарзанди бор.

Константин Меладзе 2000 йилда “ВИА Гра” гуруҳига асос солгандан кейин катта машҳурликка эришди. Брежнева 2003-2007 йиллар давомида гуруҳда ижод қилган.