“Тошкент метрополитени” ДУК вакиллари томонидан келажакда “Электрон тўлов” хизмати, энг гавжум йўналишларда Wi-Fi ҳудудлари жорий қилиш кутилмоқда.

Тошкентда бўлиб ўтган матбуот-анжуманида метро ходимлари айни пайтда метродаги барча ёритиш асбобларини энергия тежовчи аналоглари билан алмаштириш, оптик-толали линиялар ўтказиш билан шуғулланаётганлари маълум қилинди. Оптик-толали линиялар ишлаб чиқариш жараёнига татбиқ қилинадиган замонавий технологиялар миқдорини оширишга имкон беради.

Метронинг узлуксиз ишлашини таъминлаш мақсадида “Тошкент метрополитени” корхонаси негизида иккита – “Чилонзор” ва “Ўзбекистон” электр депоси ишламоқда. Яқинда маҳаллийлаштириш дастури доирасида янги депо очилди. Бу ерда ҳаракатдаги таркиб таъмирланишидан ташқари, юзлаб турдаги эҳтиёт ва бутловчи қисмлар ишлаб чиқариш йўлга қўйилди.

Ҳозирда метронинг умумий узунлиги 39 кмни ташкил қилиб, 29 станциядан иборат. Линиялар бўйлаб 192 та вагон ҳаракат қилади.