Ишбилармонлик муҳитини яхшилаш, кичик бизнес ва хусусий тадбиркорликни жадал ривожлантиришни рағбатлантириш ва уларни ҳар томонлама қўллаб-қувватлашга доир комплекс чора-тадбирларнинг амалга оширилиши натижасида Ўзбекистонда кичик бизнес ва хусусий тадбиркорликнинг мамлакат ялпи ички маҳсулотидаги улуши йил сайин ошиб, 56 фоиздан кўпроқни ташкил этмоқда, деб ёзади Давлат статистика Қўмитаси матбуот хизмати.

Манбанинг ёзишича, сўнгги йилларда иқтисодиётнинг барча тармоқларида кичик бизнес ва хусусий тадбиркорликнинг улуши ошиб бормоқда. Жумладан, жорий йилнинг январь-сентябрь ойлари якуни бўйича кичик бизнес ва хусусий тадбиркорликнинг саноатдаги улуши 34,6 фоизгача (2014 йилнинг 9 ойлигида – 31,1 фоиз), қишлоқ хўжалигида – 98,5 фоизгача (98,3 фоиз), чакана савдо айланмасида – 86,8 фоизгача (86,3 фоиз), хизматлар соҳасида – 54,7 фоизгача (49,3 фоиз), пуллик хизматлар ҳажмида – 49,3 фоизгача (47,0 фоиз), юк ташиш ҳажмида – 49,4 фоизгача (47,4 фоиз), йўловчи ташиш ҳажмида – 87,9 фоизгача (85,4 фоиз) ва бандликда – 77,5 фоизгача (77,1 фоиз) ўсди.

Шу билан бирга, кичик бизнес ва хусусий тадбиркорлик субъектларининг ички инвестиция жараёнларидаги иштироки ҳам сезиларли равишда ошиб бормоқда. Хусусан, шу йилнинг 9 ойи давомида кичик бизнес ва хусусий тадбиркорлик субъектлари томонидан 9538,6 млрд.сўм инвестициялар киритилди (Республика бўйича жами киритилган инвестициялар ҳажмининг 33,5 фоизи) ёки 2014 йилнинг январ-сентябрь ойларига нисбатан 113,0 фоизга ўсди. Шунингдек, 12188,1 млрд.сўм қурилиш ишлари бажарилди (жами қурилиш ишлари ҳажмининг 64,6 фоизи) ёки ўтган йилнинг шу даврига нисбатан 112,5 фоизга ўсди.