Фейсбук ижтимоий тармоғи бугун, 26 октябрь куни Ҳиндукуш тоғларида рўй берган зилзила муносабати билан хавфсизлик текширувини ўтказмоқда.

Унга кўра, Ўзбекистондаги фейсбук фойдаланувчиларига ҳам “Ўзингизни хавфсиз деб белгилаш орқали тинч эканлигингизни дўстларингизга билдиринг. Шундай қилсангиз, уларга хабар берилади”, деган мазмундаги хабарлар юборилди.

Айни пайтда ушбу хизмат фойдаланувчилар томонидан катта қизиқиш билан қарши олинмоқда.

Эслатиб ўтамиз, 26 октябрь куни Тошкент вақти билан соат 14:19да (Афғонистон вақти билан соат 13:39 да) Афғонистон пойтахти шимоли-шарқидан 259 км масофадаги Ҳиндукуш тоғларида 7,4 баллик зилзила содир бўлди. Афғонистон ва Покистонда табиий офат қурбонлари сони 154 нафарга етди.