Покистондагилар бугунги зилзиланинг қайталаниш хавфи туфайли ўз уйларига қайтиб кирмасликни маъқул кўришмоқда.

Geo TV телеканалида покистонликлар кўчаларда тўпланиб туришгани лавҳалари кўрсатилган. Автомобил йўлларида қатновлар тўхтаган.

Маълум қилинишича, зилзила туфайли Хайбер-Пахтунхва вилояти аҳолиси жабрланган. Бу ҳудудда кўплаб йўллар бузилган ва бинолар жиддий шикастланган.

Жароҳатланганларни шифохоналарга олиб бориш ишларига ер кўчкилари туфайли йўллар қатнов учун яроқсиз ҳолга келгани халақит қилмоқда.

Илгарироқ хабар қилинганидек, бугун, 26 октябрь куни, Тошкент вақти билан 14:09да содир бўлган зилзила эпицентри Афғонистоннинг Ҳиндукуш минтақасида кузатилиб, 7.4 баллни ташкил қилди. У Покистонда, Тожикистонда, шунингдек, Ўзбекистоннинг, Сурхондарё, Қашқадарё, Самарқанд, Тошкент, Андижон ва бошқа вилоятларида кузатилди. Ер силкинишлари Қозоғистоннинг Олма-Ота, Тароз, Чимкент, Қирғизистоннинг Ўш шаҳарларида ҳам сезилди.

Дастлабки хабарларга кўра, Покистонда зилзила қурбонлари сони 42 киши бўлган.