Туркиянинг Анталья курорти 2015 йилда россиялик сайёҳлар оқимининг камайиши оқибатида 5 млрд доллар зарар кўради. Бу ҳақда Hurriyet Daily News нашри Professional Hotel Managers Association (POYD) ташкилоти маълумотларига таянган ҳолда хабар қилмоқда.

Professional Hotel Managers Association раҳбари Али Қизилдоғнинг сўзларига қараганда, жорий йилнинг дастлабки 9 ойи ичида Россиядан келаётган туристлар оқими 25 фоизга камайиб кетди. Уларнинг харажатлари миқдори ҳам 50 фоизга қисқарди.

Бунга асосий сабаб сифатида Россияда авж олган иқтисодий инқироз келтирилмоқда. Туркия томонидан россиялик туристларни рағбатлантириш йўлида кўрилаётган чора-тадбирлар, хусусан, чартер рейсларига субсидиялар ажратиш етарлича натижа бермаётгани таъкидланди.