Халқаро валюта жамғармаси (ХВЖ) Хитой юанини ўзининг захира валюталар саватига қўшишга тайёр. Бу ҳақда 25 октябрь куни Reuters агентлиги маълум қилди.
Агентликнинг қайд этишича, ХВЖ мутахассислари томонидан тайёрланган ва ташкилот директорлар кенгаши учун тавсиялар ўрин олган ҳисоботда юаннинг саватга қўшилиши бўйича ижобий хулосалар келтирилади.

“Техник томондан барчаси режа бўйича кетмоқда, шунингдек, ҳеч қандай сиёсий тўсқинликлар йўқ. Ҳисоботда келтирилган мутахассислик фикри жэньминьби (юаннинг расмий номи)нинг саватга қўшилиши томон оғмоқда, бироқ якуний қарорни директорлар кенгаши ҳал қилади”, - дея агентлик ташкилотдаги ахборот манбаси сўзларидан иқтибос келтирди.

2015 йилнинг ноябрь ойида бўлиб ўтиши мўлжалланган директорлар кенгаши мажлисида мазкур қарор тасдиқланган тақдирда, юань саватга орадан бир йил ўтиб – 2016 йил октябрь ойида қўшилиши мумкин. Ташкилот август ойида амалдаги сават муддатини 2015 йил 31 декабридан 2016 йилнинг 30 сентябрига қадар узайтирган эди.
Айни пайтда ХВЖ овозлар пакетига тўсиқ қўйиш ҳуқуқига эга бўлган АҚШ мазкур ташаббусга ишончсизлик кўзи билан қарамоқда.