Эрон хавфсизлик хизматлари 2015 йилнинг дастлабки 9 ойида қарийб 500 тонна гиёҳванд модда мусодара қилди. Бу ҳақда Теҳронда Эрон ички ишлар вазири Абдулрўз Раҳмони Фазлий “Марказий Осиё аксилнаркотик квинтети” VI йиғилишидаги нутқи давомида айтиб ўтди. Йиғилишда Россия, Эрон, Озарбойжон, Покистон ва Тожикистон давлатларининг гиёҳванд моддаларнинг тарқалишига қарши курашувчи давлат идоралари раҳбарлари иштирок этди.

“Жорий йилнинг дастлабки 9 ой ичидаёқ Эрон хавфсизлик хизматлари гиёҳвандфурушлардан 479 тоннадан кўпроқ гиёҳванд модда мусодара қилди. Шу давр ичида 2 мингдан кўпроқ гиёҳвандфуруш гуруҳлар йўқ қилинди. Эрон ҳар йили гиёҳвандфурушлардан тортиб олинган 60 тоннадан кўпроқ гиёҳванд моддаларни ёқиб юборади. Бу бизнинг ушбу ёвузлик билан курашдаги қатъиятлигимизни намоён қилади”, деб айтди Раҳмони Фазлий.

Вазир келтириб ўтган маълумотларга кўра, Эрон ҳар йили гиёҳвандфурушлик ва наркотрафикка қарши кураш учун 1 млрд доллар сарфлайди. Бу маблағлар шу жумладан чегаралар инфратузилмасини реконструкция қилиш, уларни мустаҳкамлашга сарфланади.