ИШИД жангарилари Суриянинг Пальмира шаҳридаги тарихий устунлар ҳудудида аввал 3 кишини қатл қилиб, кейин уларнинг жасадини устунлар билан биргаликда портлатган. Бу ҳақда ССN хабар берди.

Маълум қилинишича, қатл қилинганлар жангарилар Пальмирани босиб олгач, асир қилинган маҳбуслар бўлган. Уларнинг шахси ҳақида аниқ маълумотлар йўқ.

Бироз олдинроқ, ИШИД жангарилари Пальмирадаги тарихий устунлар мажмуасини йўқ қилгани ҳақида хабар берилганди.

ЮНЕСКОнинг жаҳон маданий мероси объекти ҳисобланган Пальмира шаҳри устидан назорат 2015 йил май ойида ИШИД жангарилари қўлига ўтган эди.

Аввалроқ, октябрь ойи бошида Суриянинг Пальмира шаҳридаги антик даврга оид обидалардан яна бири бўлмиш Триумфал арк ИШИД жангарилари томонидан портлатиб юборилган эди. Қайд этиш керакки, милоддан аввалги II асрга мансуб арк шу давргача тарих силсилаларига дош бериб, ўзининг 20 метрлик баландлигини сақлаб келганди.

Август ойида эса жангарилар Пальмира шаҳридаги 2 минг йиллик ибодатхонани портлатиб юборганди.

Сентябрь ойида эса ИШИД Пальмира археологик комплексидаги бир нечта мақбара минораларини портлатиб, йўқ қилганди.