Дунёда йирик гипермаркетлар тармоғига эга Wal-Mart компанияси харидорларга ўзи буюртма қилган маҳсулотини етказиб бериш мақсадида, учувчисиз бошқариладиган учиш аппаратларини синовдан ўтказмоқчи. Компания АҚШ ҳукуматига бунинг учун рухсат беришларини сўраган.

Reuters нашрининг ёзишича компания бир неча ойлардан бери ёпиқ ҳудудда шу каби қурилмаларни синовдан ўтказиб келяпти, энди уни очиқ ҳудудда синовдан ўтказмоқчи. Бу борада Хитойнинг DJI Technology Co Ltd компаниясининг учувчисиз бошқариладиган учиш аппаратларидан фойдаланиш назарда тутилган.

Ритейлер ушбу аппаратлардан нафақат омборхоналарда, балки автотранспорт олиб келиш учун, шунингдек, бошқа вазифалар учун ҳам қўлламоқчи. Бундан ташқари, учувчисиз бошқариладиган аппаратлардан харидорларнинг уйига маҳсулот олиб бориб бериш борасида ҳам синов ишлари олиб борилмоқда.