Belgiyaning «Anderlext» jamoasi futbolchilari Yevropa Ligasi doirasida Ozarbayjonning "Qorabog‘" jamoasidan uchralgan mag‘lubiyat tufayli o‘z muxlislariga tovon puli to‘lashadi.
Belgiyaning nieuwsblad.be nashrida yozilishicha, jamoa o‘zini safar o‘yinida qo‘llab-quvvatlash uchun Bokuga borgan 53 nafar muxlisga pul mablag‘lari ko‘rinishida tovon to‘lashadi. Shuningdek, bu muxlislar jamoa bazasiga tashrif buyurishlari va futbolchilar bilan uchrashishlari mumkin.
«Anderlext» 1 oktabr kuni "Qorabog‘"ga qarshi o‘tkazilgan uchrashuvda 0:1 hisobida mag‘lub bo‘lgan. Ayni vaqtda jamoa Yevropa Ligasining J guruhida 4 ochko to‘plagan holda "Tottenhem" bilan 2 va 3 o‘rinlarni bo‘lishib turibdi. Guruh peshqadami "Monako" hisobida 5, autsayder "Qorabog‘" hisobida 3 ochko mavjud.
Ma'lumot uchun, «Anderlext» Belgiyaning 33 karra chempioni hisoblanadi. Jamoa 1983 yilda UYeFA Kubogida g‘alaba qilgan, 2 marta Kubok egalari kubogida zafar quchgan.