Apple корпорацияси молиявий йилнинг тўртинчи чорагида кўрсаткичларнинг рекорд даражада ўсгани ҳақидаги ҳисоботни эълон қилди.

Чорак давомида компания кирими 51,5 млрд доллар, соф даромад эса 11,1 млрд доларни ташкил этди. Ўтган молиявий йилда бу кўрсаткич 42,1 млрд ва 8,5 млрд долларни ташкил этди.

Шундай қилиб, бир йил ичида пул тушуми ҳажми 22,3 фоиз, соф фойда —30,6 фоиз, акциялардан даромад эса 38 фоизга ошди.

Компания ялпи фойдаси ҳам 2014 йил тўртинчи чорагидаги 38 фоиздан 39,9 фоизга қадар ўсди. Чорак мобайнидаги Apple халқаро савдоси даромадларнинг 62 фоизини ташкил этди.

Apple мазкур ўсишларни янги iPhone смартфонлари, Apple Watch “ақлли” соатлари савдосининг ошгани, рекорд даражада сотилган Mac`лар ва хизмат кўрсатиш соҳасидаги даромадлар билан боғламоқда.

“2015 йил Apple учун барча даврлар (мавжуд бўлганидан буён)даги энг омадли бўлди, даромадлар 28 фоизга ортиб, 234 млрд долларга етди”, - дея қайд этди компания раҳбари Тим Кук.

Унинг сўзларига кўра, муваффақият “ер юзидаги энг яхши ва инновацион маҳсулотлар”ни яратишга эришиш натижасида қўлга киритилди.