БМТ ҳуқуқ ҳимоячилари Эронда амалга оширилаётган ўлим жазолари сонининг кескин ошиб кетганидан хавотирланмоқдалар, деб маълум қилмоқда Spiegel нашри.

БМТнинг Эрондаги инсон ҳуқуқлари масалалари бўйича маърузачиси Аҳмад Шоҳиднинг таъкидлашича, 2005 йилдан бери Эронда қатллар сони мунтазам ошиб борган. Унинг айтишича, Эронда ҳар йили дунёнинг исталган бошқа давлатидан кўпроқ қатллар амалга оширилади.

Шоҳиднинг таъкидлашича, Эронда 2014 йилда 753 киши қатл этилган, бироқ 2015 йилда қатллар сони мингдан ошиб кетиши мумкин. Унинг айтишича, амалга оширилган қатлларнинг аксарияти халқаро ҳуқуққа зиддир.

БМТ маълумотларига кўра, жорий йилнинг биринчи ярмида 69 фоиз қатл этилганлар гиёҳванд моддалар билан боғлиқ жиноятлар учун қатл этилган. Шоҳиднинг айтишича, баъзилар фейсбукда ёки бошқа ижтимоий тармоқларда билдирган фикрлари учун қатл этилган. Шоҳид Эрон ҳукуматини жиддий жиноятлардан бошқа барча жиноятлар учун ўлим жазосига тақиқлов киритишга чақирди.