Бирлашган Миллатлар Ташкилоти Луганскда иш олиб боришга рухсат олди, деб хабар бермоқда РИА “Новости” ахборот агентлиги. Бу ҳақда Европада хавфсизлик ва ҳамкорлик ташкилоти (ЕХҲТ) вакили Мартин Сайдик маълум қилди.

“Бугун мамнуният билан шуни маълум қиламанки, келиб тушган ахборотга кўра, БМТ агентликлари Луганск вилоятининг алоҳида туманларида ишлашлари мумкин бўлади”, деб айтди Сайдик.

Сайдик “Донецкнинг алоҳида ҳудудлари ҳам бу ибратли ишга амал қилишади”, деб умид билдирди.

Аввалроқ Донбасс учун инсонпарварлик ёрдами олиб кетаётган БМТнинг 800 га яқин юк машинаси ўзини мустақил деб эълон қилган, тан олинмаган Донецк халқ республикаси ва Луганск халқ республикаси ҳудудларига кира олмаётгани маълум қилинганди.

Сайдикнинг маълум қилишича, "ДХР" ва "ЛХР" айирмачилари ҳудудида бир ойдан бери БМТ ташкилотларининг фаолият олиб боришига тақиқлов амал қилмоқда. Ушбу республикалар вакиллари бундай чора кўрилганини БМТ томонидан нотўғри расмийлаштирилган ҳужжатлар тақдим қилингани билан тушунтиришмоқда.