Маълум қилинишича, 27 октябрда Россиянинг узоқ масофаларга учувчи, кемаларга қарши иккита Ту-142 самолёти бир денгиз миляси (1,8 км) узоқлигида ва 150 метр баландликда АҚШнинг “Рональд Рейган” авиаташувчиси олдидан учиб ўтган. 

Воқеа кема Корея яримороли яқинида халқаро сувларда бўлганда юз берган, деб маълум қилди АҚШ ҳарбий-денгиз кучлари Еттинчи флоти вакилига иқтибос келтирган ҳолда АҚШ Қуролли кучларининг Stars and Stripes нашри.

Кема Корея яримороли яқинида режа бўйича манёврлар бажараётган бўлган. АҚШ ҳарбийлари учувчилар билан радиоалоқа орқали боғланмоқчи бўлган, бироқ ҳеч қандай жавоб олмаган.

Натижада кемадан тревога бўйича 4 та F/A-18 Super Hornet ҳарбий самолёти ҳавога кўтарилган.

Еттинчи флот вакили, лейтенант Лорен Коулнинг айтишича, АҚШ “халқаро сувлардаги барча операцияларни бошқа давлатларнинг ҳуқуқларига мос равишда ўтказиш ва хавф-хатарсиз ҳаракат қилиш кераклигидан” огоҳлантирмоқда.