Британиялик шаҳзода Ҳарри Афғонистондаги уруш ўз ҳаётида қандай ўзгаришлар содир этгани ҳақида гапириб ўтди. У бу ҳақида АҚШга сафари давомида, Виржиниядаги ҳарбий госпиталга борган вақтида сўзлаб берган.

"Мен 2 марта Афғонистонга сафар қилдим ва бу сафарлар ҳаётимда бурилиш паллалари бўлди. Урушдаги хотиралар ўчмас бўлиб муҳрланиб қолади", дейди шаҳзода.

У ўз ҳаётини уруш фахрийларига ёрдам кўрсатиш, хайрия тадбирлари ўтказиш ва ёввойи табиатни муҳофаза қилиш соҳасида ишлайдиган ташкилотлар билан ҳамкорлик қилишга бағишлашга қарор қилгани ҳақида таъкидлаб ўтган.

"Мен Афғонистонга биринчи сафаримдан қайтишда жангда оғир ярадор бўлган британиялик ҳарбий билан битта самолётда қайтдим. Бортда шунингдек, жанг вақтида ҳалок бўлган даниялик аскарнинг мурдаси ҳам бор эди. Ўшанда мен бундан кейин ҳарбийларнинг урушдан кейинги ҳаётида қадрсиз бўлмаслиги учун қайғуришга қарор қилгандим", дея қайд этади Ҳарри.

Шаҳзода Ҳарри АҚШга сафари давомида Барак Обама билан учрашган. У Оқ уй раҳбари билан келгуси йилнинг май ойида Флоридада ўтказилиши белгиланган «Забт этилмаганлар ўйини»ни муҳокама қилди. Унда жанг майдонларида яраланган фахрийлар иштирок этиши кўзда тутилган.

Маълумот учун, Уэльс шаҳзодаси Чарльзнинг кичик ўғли – шаҳзода Ҳарри 2015 йил июнида ҳарбий хизматни тугатди. У профессионал ҳарбий бўлиб, нуфузли Сандхерст академиясида ўқиган ва пиёда қўшин капитани унвонига эга. Шаҳзода 2007−2008 йилларда ва 2012 йилда (5 ой давомида) Афғонистондаги жанговар ҳаракатларда қатнашган. 2011 йили капитан унвонини олган. Сўнгги марта 2015 йил баҳорида Австралияда хизмат қилганди.