Шереметьево аэропортининг транзит зонасидаги суриялик қочқинга нисбатан жиноий иш очилди. Бу ҳақда Россия федерал миграция хизмати бошлиғини Константин Ромодановский маълумотига асосланиб, РИА Новости хабар бермоқда.

Суриялик қалбаки ҳужжат билан чегарани ноқонуний бузганликда гумон қилиняпти. Ромодановскийнинг таъкидлашича, Сурия фуқароси тергов остида бўлиб турган бир пайтда, унга бошпана масаласини кўриб чиқиш мумкин эмас.

Унинг сўзларига кўра, миграция хизмати суд ҳукмидан кейингина “унга Россия ҳудудидан бошпана бериш масаласини қайта кўриб чиқади”. Агар ижобий ҳукм чиқарилса, у қочқинлар учун ташкиллаштирилган марказлардан бирига олиб бориб жойлаштирилади.

10 сентябрь куни Шереметьевога Ироқ ва Сурия паспортига эга тўрт фарзандли эга оила келди. Улар қариндошлари яшайдиган Самарага боришни режалаштиришган эди. Божхона текширувидан ўтишаётганда, улар бошпана сўрашган. Россия федерал миграция хизмати ходимлари уларни текшириб кўришганда, паспортлари қалбаки бўлиб чиққан эди.