Хитой бош вазири Ли Кэцян ва Германия канцлери Ангела Меркель бугун, 29 октябрь куни Суриядаги можароларни муҳокама қилишди, дея хабар беради Reuters.

Хитой бир неча маротаба мазкур масалани куч ишлатмасдан ҳал қилиш зарурлигини таъкидлаб келган. Ли Кэцян бу борада сиёсий аралашув имкон қадар тез бўлиши кераклигини таъкидлади.

«Энг муҳими барча учун қулай вақтни танлаб тенг ҳуқуқли очиқ сиёсий суҳбат олиб бориш керак», — дейди бош вазир.

Унинг сўзларига кўра, кўплаб сиёсий етакчилар мазкур инқироздан чиқиб кетиш учун ўз талқинларини билдиришмоқда.

«Биз вазиятдан чиқиб кетиш учун БМТ ёрдамида умумий қарорга келинишига умид қиламиз», —деди Ли ва Хитой «конструктив роль»да қолишини қўшимча қилиб ўтди.

Манбада ёзилишича, Ангела Меркель Ли Кэцяннинг фикрини маъқуллаган.

«Мамлакатлар бу борада ақлли қарор чиқаришлари зарур. Ҳозирча энг камида томонларнинг музокаралари бўйича баъзи натижалар бор», — дея таъкидлаган Меркель.