Эркин кураш бўйича Ўзбекистон терма жамоаси тарихидаги энг кўп унвон олган спортчи, уч карра Олимпия чемпиони, Олимпия ўйинлари кумуш медали совриндори Артур Таймазов ўзининг спортчилик фаолиятини якунлаши ҳақида маълум қилди.

У 2016 йилги Рио олимпиадасига бормаслигини маълум қилган.

"Ҳа, бу савол ҳал қилиб бўлинди. Кўзимда ўтказилган жиддий операция туфайли жуда кўп вақтни йўқотдим. Шифокорлар бошқа шуғулланмаслигим кераклиги ҳақида айтишди. Қолаверса қолган вақт ичида мен Олимпиадада муносиб қатнашиш учун тайёр бўлишга улгурмайман. Сайёҳ сифатида боришдан эса маъни йўқ. Энди спортчилик фаолиятимни якунлайман ва фан билан шуғулланишни бошлайман", дейди Таймазов "Весь спорт" нашрига берган интервьюсида.

У П.Ф.Лесгафт номидаги университитетда аспирант сифатида ўқишни бошлагани, профессор Борис Тараканов раҳбарлигида илмий иш устида изланаётгани шу орқали спорт ривожига ҳисса қўшиш ниятида эканини айтиб ўтган.

Асли осетиялик, Ўзбекистон номидан курашган Артур Таймазов мамлакат тарихидаги олтита Олимпиада олтин медалларининг учтасини олиб келган (2004, 2008, 2012). У 2000 йилги Олимпия ўйинларида кумуш медал олган, икки марта жаҳон чемпиони, 2 марта Осиё чемпиони, 3 марта Осиё ўйинлари чемпиони бўлганди.

У Ўзбекистон олдидаги хизматлари учун 2012 йилда "Эл-юрт ҳурмати" ордени билан тақдирланган.