Strategy Analytics ҳисоботида маълум қилинишича, 2015 йилда смартфонларнинг сотилиши кўрсаткичлари секинлашди ва бу кўрсаткичлар кейинги 6 йил ичидаги энг паст кўрсаткич бўлди. Бу ҳақда Engadget нашри хабар берган.

Strategy Analytics ҳисоботига кўра, 2015 йилнинг 9 ойида ўтган йилнинг шу даврига нисбатан 10 фоизлик ўсиш қайд этилган ва бу рақам жуда кичик ҳисобланади. 2009 йилдаги молиявий инқироздан бери бунчалик секин ўсиш қайд этилмагани айтилган.

Тадқиқотчиларнинг фикрича, ўсиш кўрсаткичларининг пасайишига истеъмолчиларнинг аксар қисми бир нечтадан смартфонга эгалиги ва улар ҳар йилда янги смартфонлар харид қилишга зарурат сезишмаётгани асосий сабаб бўлади.

Ўсиш кўрсаткичлари секинлашганига қарамасдан, смартфонлар саноатида Samsung компанияси ўз маҳсулотлари нархларини тушириш эвазига барқарорлигини сақлаб қолган. Apple эса бу борада Samsung компаниясидан ортда қолмоқда ва бозорда атиги 14 фоизлик улушга эга (ўтган йилдагига нисбатан 2 фоиз ўсиш) бўлиб турибди.