Noma Sydney ресторанининг бўш жойлари 4 дақиқа ичида сотилиб кетди, деб хабар беради News.com.au портали. Noma Sydney Даниянинг Noma ресторанининг Австралиядаги филиали бўлиб, уни машҳур ошпаз Рене Редзепи бошқаради.

Муассаса бир неча маротаба дунёнинг энг яхши ресторани деб тан олинган эди. Сиднейдаги муассаса жойларини банд қилиш маҳаллий вақт билан соат 10:00да очилиб, 10:04да барча столлар эгаллаб бўлинди. мижозлар икки, тўрт, олти ва саккиз кишилик ўринлар таклиф қилинди.

Noma’нинг бўлинмаси Сиднейда кейинги йилнинг 26 январидан 2 апрелига қадар ишлайди. Тушлик ёки кечликнинг нархи, шаробни ҳисобга олмаганда, 485 долларни ташкил қилади.
Ресторан 2003 йили очилган эди. У 2010, 2011, 2012 ва 2014 йилларда дунёнинг энг яхши тамаддихонаси деб топилган эди. Редзепи эса бир неча маротаба дунёнинг энг нуфузли ошпазига айланган эди.