Грузияда мамлакатнинг собиқ президенти Михаил Саакашвилини фуқароликдан маҳрум қилиш жараёни бошланди, деб хабар берди Грузия адлия вазири Теа Цулукиани.

“Бир неча кун аввал украин тилида расмий нота келди, унда Михаил Саакашвили Украина фуқаролигига олинганлиги маълум қилинган. Украинанинг расмий ҳужжати ҳисобланадиган шу нота асосида Грузия қонунчилиги ва у томондан ўз зиммасига олинган халқаро мажбуриятларга кўра биз бугун Михаил Саакашвилини Грузия фуқаролигидан маҳрум қилиш жараёнини бошлаймиз”, деб айтди вазир.

Вазирнинг айтишича, Саакашвилига фуқаролик борасида бир тўхтамга келиши учун “маълум муддат” тақдим қилинади.

Аввалроқ Михаил Саакашвили Украинанинг Одесса вилояти губернатори этиб тайинлангандан кейин Грузия фуқаролигидан воз кечгани маълум қилинган эди.