АҚШ ҳукумати томонидан муаллифлик ҳуқуқини бузганликда айбланиб қидирилаётган, MegaUpload.com сервиси асосчиси Ким Дотком SydStart стартаплар конференциясидаги қисқа видеочиқишида аноним ва хавфсиз MegaNet тармоғи ҳақида маълумот берди.

Mashable нашрининг ёзишича, тармоқ махсус хизматлар таъқибидан тамомила озод бўлади.
Дотком таклиф қилган янги интернет асосида blockchain алгоритми ётади. У Bitcoin криптовалютаси асосида ишлайди, ўта узун криптокалитларнинг қўлланиши эса у ердаги аккаунтларни бузиб киришни суперкомпьютерлар орқали амалга оширишга ҳам имкон қолдирмайди.

Тармоқ ускуналари уникал IP адресларига эга бўлмайди, шу боис уларни кузатиш ва жойини аниқлаш янада мураккаблашади. Тармоқ, Доткомнинг ишонтиришича, “одамлардан одамларга” тарқатилади.
MegaNet амалдаги инфраструктурадан фойдаланади, лекин уни янги босқичга кўтаради.