БААнинг Абу-Даби шаҳрида давом этаётган дзюдо бўйича “Катта Дубулға” туркумига кирувчи нуфузли мусобақанинг биринчи куни ортда қолди. Турнирнинг биринчи куни терма жамоамизга иккита бронза медалини тақдим этди.

-60 кг вазн тоифасида татамина чиққан Диёрбек Ўрозбоев ярим финалга қадар мағлубиятсиз етиб борди. Ўз гуруҳида Франция, Бразилия ва грузиялик полвонларни мағлуб этган ҳамюртимиз финал остонасида мўғулистонлик Тсогтбаатар Тсендочирга имкониятни бой бериб қўйди. Бронза медали учун кечган баҳсда эса у арманистонлик Хованнес Давтяндан устун келди.

Диёр Ўрозбоев ва Ришод Собировда бронза!

Терма жамоамизга иккинчи бронза медалини Ришод Собиров келтирди. -66 кг вазн тоифасида татамига чиққан Олимпия ўйинларининг икки карра бронза медал совриндори ўтириш турнирида канадалик Антоин Бучардни, бронза медал учун кечган баҳсда германиялик Себастьян Сиедлни таслим этди. Ришод Собиров ярим финалга бериладиган учрашувда бўлажак кумуш медал совриндори россиялик Арсен Галстянга ютқазиб қўйганди.

Ҳозирча терма жамоамиз умумжамоа ҳисобида 2та бронза медали билан 88та давлат орасида 9-поғонада бормоқда. Жанубий Корея терма жамоаси 2та олтин медал билан биринчи ўринни банд этган. Дзюдо ватани Япония эса ҳали бирорта ҳам медал олгани йўқ.