Тошкент давлат аграр университети “Қишлоқ хўжалигини механизациялаш” факультети олимлари томонидан чорвачиликка ихтисослашган фермер, деҳқон ва шахсий хўжаликлари учун кичик ҳажмдаги “Роторли-дискли дон майдалагич” қурилмасини ишлаб чиқишди,-дея хабар беради, университет қошидаги “Инновация ва интеграция Маркази” ходимлари.

Ҳозирги кунда чорвачиликга ихтисослашган фермер хўжаликларида долзарб муоммалардан бири меҳнат талаби катта технологик жараёнларни электромеханизациялаштириш ва автоматлаштириш ҳисобланилади. Чунки, чорвачиликда кичик механизация воситаларининг етишмаслиги натижасида асосий технологик жараёнлар қўлда бажарилади. Шуни хисобга олиш керакки, озуқа тайёрлаш технологик жараёни металл ва энергия сиғими катта машиналар базасида бажарилади, натижада ишлаб чиқараётган маҳсулотларнинг таннархи ошиб кетади.

Қурилма асосчилари дон майдалагични яратишда ўз олдиларига қуйидаги вазифаларни ижобий ҳал этишга асосий эътиборларини қаратишди ва ўз мақсадларига эришишди:

  • Ø энергетик кўрсатгичларини пасайтириш;
  • Ø сифат кўрсатгичларини яхшилаш;
  • Ø иқтисодий самарага эришиш.

Тошкент давлар аграр университети олимлари таклиф этаётган роторли-дискли дон майдалагич, кичик фермер, деҳқон ва шахсий хўжаликлар учун мўлжалланган бўлиб, металл ва энергия сиғими кам, бир ва уч фазали электр тармоқларида ишлатилиши мумкин, нисбий энергия сарфи жахон стандартларига жавоб беради ва 0,005 кВт*соат/ кг дан ошмайди, сифат кўрсатгичлари бўйича майдалагичда майдаланган дон заррачалари ўлчамларининг бир хиллигини таъминлаши билан белгиланади. Майдалагич IAF № 20040161 рақамли патенти билан ҳимояланган. Майдалагичнинг  ротор ва статор оралиғидаги тирқишини ўзгартириш орқали моллар ва паррандаларнинг тури, гуруҳига қараб керакли майдаликда майдаланган ёрма олиш имконини беради. Майдалагичда майдаланган ёрмадан сифатли аралаш ем тайёрлаш ва озуқаларнинг тўйимли моддаларидан тўлиқ фойдаланиш имконини беради, чиқинди чиқиши сезиларли даражада камаяди.

Жорий йилнинг 19-21 май кунлари “ЎЗЭКСПОМАРКАЗ” да бўлиб ўтган “Инновацион ғоялар, технологиялар ва лойиҳалар VIII Республика ярмаркаси”да ушбу қурилманинг саноат нусхаси намойиш этилди ва ярмаркага келган кўплаб фермер хўжаликлари раҳбарларининг қизиқишига сабаб бўлди. Ярмарка доирасида ушбу қурилмага буюртмалар олиниб 30 млн. сўмлик шартномалар имзоланди.