Туркия ички ишлар вазирлигининг маълум қилишича, 1 ноябрда мамлакатда муддатдан олдин бўлиб ўтадиган парламент сайловларини 380 минг нафарга яқин полиция ва жандармерия ходими қўриқлаб боради. Меҳнат таътилидаги барча ходимлар ҳам бу ишга сафарбар этилади. Маҳаллий матбуот хабарига кўра, Истамбулда 37 минг нафар ҳуқуқни муҳофаза қилувчи ходим навбатчилик қилади.

Анқарада эса 12 минг нафар полиция ва жандармерия ходими сафарбар этилади. Шаҳарда фавқулодда ҳолатлар содир бўлган тақдирда қўшимча кучлар оёққа турғизилади. Теракт хавфи ёки халқ қўрқуви юқори ҳудудларда эса армия мададига суянилади.

Сайловлар тугаганидан сўнг, овоз берилиши қайд этилган бюллетенлар махсус зирҳланган машиналарда, полиция ва жандармерия назорати остида сайлов қўмитасига етказилади.