Бугун империянинг қулашидан сўнг яна ҳам ёш, тинч ва яна ҳам кучли ҳолда қайта туғилган Туркия Республикаси ташкил топганлигининг 92–йиллигини Сиздек дўст ва қардошларимиз билан биргаликда нишонлаётганимиздан беҳад хурсандмиз, — деди Ўзбекистондаги Туркия элчиси Намик Гюнер Эрпул.

У Туркия президенти Ражаб Тоййиб Эрдўғоннинг табрик сўзини ўқиб эшиттирар экан, 92 йиллик тарих турк халқи учун энг оғир шароитларда қандай қилиб қайтадан ўнгланиб олиш лозимлигини кўрсатувчи, келажакдан умид берувчи, ҳар бир қадамдан дарс чиқарилиши лозим бўлган давр бўлганлигини айтиб ўтди.

Жумладан табрикда, “Бугун Туркия Республикаси давлати нафақат ўз фуқаролари, балки минтақамиз ва дунёдаги барча жабрдийдалар, мазлумлар, қавм ва қардош жамоаларнинг ҳам умид манбаисидир. Биз 1919 йил жуда оғир шароитларда бошлаган Озодлик урушини қандай қилиб 1923 йили янги давлатимизнинг тузилиши билан якунлаган бўлсак, бугун рўбарў бўлиб турган қийинчиликларни ҳам, иншолло, 2023 йил мақсадларимизга эришиб, ортда қолдирамиз. Миллатимизнинг муштарак асари ҳисобланган Республикамизга эгалик қилиш, юртимиз ва миллатимизнинг келажаги учун меҳнат қилиш, курашиш, лозим бўлса фидокорлик қилиш - барчамизнинг бурчимиздир”, дейилади.

Намик Гюнер Эрпул юқоридаги сўзларга қўшимча қилар экан, Туркияда ортда қолган теократик, монархия ва якка ҳокимликка асосланган ҳукуматдан дунёвий-демократик, ижтимой ва мустаҳкам қонунчилик асосларига эга бир давлат ташкил этилганлигини таъкидлади.

У бугунги кунда Туркия Республикаси 78 миллиондан иборат ёш аҳолиси ва динамик иқтисодиёти билан дунёда ўн еттинчи, Европада эса энг йирик олтинчи иқтисодиёт даражасига эришганлиги, Туркия 2023 йилда, яъни Республиканинг 100 - йиллигида дунёнинг энг йирик, энг тараққий этган 10 мамлакат орасида бўлишни ўз олдига мақсад қилиб қўйганлигини ҳам айтиб ўтди.

“Туркия Республакаси ташкил топганидан бери 92 йил давомида ташқи сиёсатида, дунёда тинчлик, ҳамжиҳатлик, адолат ва ҳотиржамлик, бошқа давлатларнинг ички ишлари ва ҳудудий даҳлсизлигига ҳурмат қилган ҳолда халқаро инсон ҳуқуқлари ҳамда эркинликлари каби ғояларни барча нарсадан устун деб билиб келмоқда. Мазкур ғоялар бундан кейин ҳам Туркия ташқи сиёсатининг асосий мустаҳкам тамойилларидан бири бўлиб хизмат қилишда давом этади, — деди сўзини якунлар экан Намик Гюнер Эрпул.