"Спорт" телеканалининг "Соккер клуб" кўрсатувининг янги сони келишилган ўйинларга қарши курашга қаратилди. Ушбу кўрсатув доирасида ЎФФ қошидаги "Келишилган ўйинларга қарши кураш" қўмитаси раҳбари Аҳрол Иноятовдан ҳам интервью олинган.

- Келишилган ўйинларни аниқловчи мутахассислар гуруҳидан кимлар ўрин олганини номма-ном санаб бера оласизми?
- Ҳа, албатта, улар - Самвел Бабаян, Игорь Шквирин, Сардор Раҳматуллаев, Фарҳод Магометов, Бахтиёр Бобоев, Равшан Эрматовлар. Ҳозир мана Кападзени жалб этишни кўзлаб турибмиз. Кейинчалик "Нефтчи" ва "Насаф"дан ҳам вакиллар бўлади.

- Сиз айтган мана шу мутахассислар орасида келишилган ўйинларда иштирок этганлар йўқлигига кафолат бера оласизми?
- Агар кимдир ўз номига доғ туширган бўлса, улар сафимиздан ўчирилади. Масалан илгари мутахассислар гуруҳида Рустам Мирсодиқов ҳам бор эди, аммо уни ҳозир четлатганмиз.

- Демак шу вақтгача бўлган оралиқда бир киши шубҳали ўйинларда иштирок этишга улгуриб ҳам қўйган.
- Ҳа.

Эслатиб ўтамиз, ЎФФ президенти Мираброр Усмонов жорий мавсум бошланиши олдидан келишилган ўйинларда иштирок этганлар қаттиқ жазоланишини айтган эди. Ўз навбатида 2015 йилнинг 25 сентябрида бўлиб ўтган "Пахтакор" - "Металлург" ўйини (3:2) шубҳали деб топилган ва "Металлург" бош мураббийи Рустам Мирсодиқов мавсум охирига қадар футболдан четлатилган. ЎФФ президенти Мираброр Усмонов "Пахтакор" клубига нисбатан мавсум охирида қатъий жазо чоралани кўрилишини ваъда қилган эди.

Манба: www.uff.uz