Мисрнинг Синай яриморолида 31 октябрда фалокатга учраган Airbus 321 самолёти ҳавода парчаланиб кетган, бироқ фалокат сабаблари ҳақида хулоса чиқаришга ҳали эрта, деб айтди Давлатлараро авиация қўмитаси ижрочи директори Виктор Сороченко. Бу ҳақда РИА “Новости” ахборот агентлиги хабар бермоқда. 

Сороченко буни самолёт қулаган жойни кўздан кечиргандан кейин айтган.

“Хулосалар чиқаришга ҳали эрта. Самолёт ҳавода парчаланиб кетган ва самолёт бўлаклари катта майдонда ёйилиб ётибди”, деб айтди Сороченко.

Аввалроқ Россия ТИВ вакили Мария Захарова Миср Россияга фалокатни тергов қилишда барча зарурий ёрдамни бераётганини айтган эди.

31 октябрда Шарм-ал-Шайҳдан Санкт-Петербургга учиб кетаётган “Когалимавиа” авиакомпаниясининг Airbus A321 самолёти Мисрда фалокатга учраган эди. Самолётда бўлган 224 кишининг барчаси ҳалок бўлган.