Мисрда қулаб тушган A321 самолёти йўловчиларининг жасадлари ортилган илк самолёт бугун кечаси Санкт-Петербургга келиши кутилмоқда. Бу ҳақда "Россия 24" телеканалида маълум қилинган.

"Илк самолёт Қоҳирадан соат 9да учиши керак эди. Лекин маълум сабабга кўра парвоз кечиктирилган. Энди бу самолёт бугун кечгача Санкт-Петербургга қўниши кутилмоқда", дейилади хабарда.

Телеканал мухбирининг маълумот беришича, бу самолётда марҳум йўловчилардан 80 нафарининг жасади олиб келинади.

Бироз олдинроқ, Россия ФВВ раҳбари қутқарувчилар марҳум йўловчиларнинг барча жасадлари яқин вақт ичида аниқланиши ҳақида айтиб ўтганди.

Эслатиб ўтамиз, 31 октябрь куни Миср вақти билан 6:51 да (Тошкент вақти билан 9:51) Россиянинг "Когалимавиа" авиакомпаниясига тегишли Шарм аш-Шайх — Санкт-Петербург йўналиши бўйича 9268 рейсини амалга ошираётган Airbus-321 лайнери парвозга кўтарилгандан 23 дақиқа ўтиб радарлар экранидан йўқолди. Мазкур самолёт бортида 217 нафар йўловчи ва етти нафар экипаж аъзоси бўлган.