ИШИД жангарилари Ироқнинг Мосул шаҳрида ўз тасарруфидаги машғулот лагеридан қочиб кетишга уринганида қўлга тушган 12 нафар болани қатл қилди. Бу ҳақда курдларнинг Rudaw телеканали маълум қилган.

"Камида 12 нафар норасида ИШИД ғояси қурбони бўлди. Улар ўзлари мажбурлаб жангариликка ёлланган ва оғир машғулотлар ўтказган лагердан қочиб кетмоқчи бўлишганида қўлга тушишганди. Ўлдирилган болалар 12дан 16 ёшгача эди", деб хабар қилган Курдистон демократик партияси вакили Саид Мамзуний.

Шу йилнинг февралида дунё жамоатчилиги ИШИД ўз сафида ёш болаларни ҳам жангариликка тайёрлаётганидан бохабар бўлганди. Интернетга жойлаштирилган видеоларда ёш болалар бошлиқнинг буйруқлари бўйича қийин машқларни бажараётгани тасвирланади. Шунингдек, бундай жараёнларни ифодаловчи кўплаб суратлар тарқатилган.