Мисрда фалокатга учраган Россия самолёти учувчиси фалокатдан олдин Шарм-ал-Шайҳ аэпоротидаги авианозирларга ёрдам сўраб мурожаат қилмаган. Бу ҳақда Миср фуқаролик авиацияси вазири Ҳусам Камол маълум қилди. Бу ҳақда РИА “Новости” ахборот агентлиги хабар бермоқда. 

“Авианозирларнинг Россия самолёти билан алоқаси фалокатгача нормал тартибда олиб борилган”, деб айтди Камол. Унинг айтишича, “рус учувчиси ҳеч қандай ёрдам сўрамаган, самолёт радарлардан бирданига йўқолиб қолган”.

Аввалроқ Шарм-ал-Шайҳ аэропортидаги манба самолёт ҳавога кўтарилгандан кейин учувчи нозир билан боғланиб, техник носозликлар ҳақида хабар бергани ва йўналишни ўзгартириб, самолётни Қоҳирада қўндиришга рухсат сўраганини айтган. Шундан кейин алоқа узилиб қолган.

“Интерфакс” ахборот агентлиги Мисрнинг авиация соҳасидаги расмийларига иқтибос келтирган ҳолда учувчи самолёт қурилмалари билан пайдо бўлган муаммолар сабабли Синай яриморолининг шимолидаги Ал-Ариш шаҳри аэропортида шошилинч қўнишни талаб қилган.

Воқеа жойида қутқарувчилар иш олиб бормоқдалар. Қора қутилар топилган ва ўқилиши бошланган.

Россия Тергов қўмитаси фожиа юзасидан иккита жиноий иш қўзғатди. “Когалымавиа” авиакомпанияси ва “Бриско” туроператори (самолётда шу компания мижозлари бўлган) ҳамда Домодедова аэропортида (самолёт шу аэропортга бириктирилган бўлган) тинтувлар ўтказилмоқда.

1 ноябрь Россияда фожиа қурбонлари хотирасига мотам куни деб эълон қилинди.