Тошкентда ярим ноқонуний “квартира бозори” ўрнига Кўчмас мулк маркази ташкил этилади, дея хабар бермоқда Sputnik агентлиги Ўзбекистон Риэлторлик ташкилотлари ассоциациясидаги ахборот манбасига асосланган ҳолда.
Унинг сўзларига кўра, ассоциация айни пайтда мазкур масалани кўриб чиқмоқда. Режага кўра, Кўчмас мулк маркази пойтахтдаги Integro савдо комплекси базасида ташкил этилади. Марказ ушбу комплекснинг бир қаватини эгаллайди.
“Фикримизча, Integro биносида Кўчмас мулк маркази томонидан турар-жой ва бошқа кўчмас мулклар савдо-сотиғи ҳамда ижараси бўйича кенг кўламли хизматларни кўрсатиш учун жойлар етарлича. Мазкур марказда харидор ва ижарага олувчилар шу ернинг ўзида зарур маълумотларни олиш ва қўшимча босқичларга эҳтиёж қолдирмайдиган даражада шартномаларни имзолашларини ташкил этишни режалаштирганмиз”, - деди агентлик суҳбатдоши.
Шунингдек, марказда нотариуслар, кўчмас мулк бўйича консультантлар идоралари ҳам жойлаштирилиб, улар томонидан қўшимча юридик хизматлар кўрсатилади. Ахборот манбасининг қўшимча қилишича, бу ерда харид қилинаётган ёки ижарага олинаётган манзилнинг “криминал тарихи” тўғрисида маълумотлар базасидан бохабар бўлиш мумкин.
Марказдаги барча жараёнлар “ягона ойна” тамойили асосида олиб борилиб, бу ерда барча ишончли маълумотларга эга бўлиш ва олди-сотди ёки ижара шартномасини расмийлаштириш имконияти тақдим этилади.
Ассоциация вакилининг фикрича, Тошкент шаҳрида Кўчмас мулк марказининг очилиши нафақат мазкур соҳада хизмат кўрсатиш сифатини оширади, балки “қора” риэлторларга қарши курашнинг самарали усулларидан бири ҳисобланади ҳам. Маълумотга кўра, Integro комплексидаги марказ очилишини билан ярим ноқонуний кўчмас мулк бозори фаолияти босқичма-босқич тугатилади.